बर्दिबास। आलुको बोराभित्र लुकाएर काठमाडौं लैजान खोजिएको ४५.१९० ग्राम खैरो हेरोइनसहित तीन जना पक्राउ परेका छन्।
लागुऔषध नियन्त्रण ब्युरो शाखा कार्यालय बर्दिबासबाट खटिएको प्रहरी टोलीले मङ्गलबार सिन्धुलीको कमलामाई नगरपालिका-९ भिमानस्थित बीपी राजमार्गमा सवारी साधन जाँचका क्रममा महोत्तरीबाट काठमाडौंतर्फ जाँदै गरेको मधेश प्रदेश ०५-००१ ज ००८६ नम्बरको हाईसबाट उक्त परिमाणको खैरो हेरोइन बरामद गरेको हो।
प्रहरीका अनुसार हाईसमा सवार सिरहाको मिर्चैया नगरपालिका-५ का २० वर्षीय सन्देश यादवलाई पक्राउ गरिएको थियो। प्रारम्भिक अनुसन्धानका क्रममा बरामद लागुऔषध काठमाडौंसम्म लैजान दिई प्रहरीले हाईसलाई निगरानी (स्कर्टिङ) गर्दै पछ्याएको थियो।
यसक्रममा मोटरसाइकलमा स्कर्टिङ गरिरहेका धनुषाको कमला नगरपालिका-७ का २० वर्षीय राहुल कुमार मण्डल र सिरहाको कल्याणपुर नगरपालिका-६ का २० वर्षीय अभिषेक कुमार साहलाई पनि पक्राउ गरिएको प्रहरीले जनाएको छ।
प्रहरीले घटनास्थलबाट ४५.१९० ग्राम खैरो हेरोइन, बा.प्र. ०२-०४६ प ४८५३ नम्बरको मोटरसाइकल र एक थान मोबाइल बरामद गरेको छ।
पक्राउ परेका तीनै जनालाई आवश्यक अनुसन्धान तथा कानुनी कारबाहीका लागि इलाका प्रहरी कार्यालय भिमान, सिन्धुलीमा बुझाइएको प्रहरीले जनाएको छ।
